Заңның 12-бабына жаңа тармақшалар енгізу ұсынылады
Ашық НҚА сайтында сайлау туралы ҚР Конституциялық заңына өзгерістер енгізу жобасы жарияланды, деп хабарлайды Almaty-akshamy.kz. Заңның 12-бабына жаңа тармақшалар енгізу ұсынылады, осылайша ҚР Орталық сайлау комиссиясына қоғамдық бірлестіктер мен коммерциялық емес ұйымдарды аккредиттеу тәртібін әзірлеу және бекіту өкілеттіктері беріледі. Сонымен бірге, Орталық сайлау комиссиясы сайлауды, референдумды дайындау мен өткізу кезеңінде сайлау комиссияларын ұйымдастыру мен олардың қызметі үшін қажетті тауарларды, жұмыстар мен көрсетілетін қызметтерді сатып алу қағидаларын әзірлеп, бекітетін болады. Әлеуметтік желіде қоғам қайраткерлері бұл түзетулер тәуелсіз бақылаушыларды, оның ішінде шетелдік ұйымдардан қаржыланатын бақылаушыларды үкіметтік емес ұйымдардан куәлік алуға мәжбүр етеді деп алаңдап отыр. Оның көпшілігі тек қағаз жүзінде ғана бар және бұрын-соңды аффилирленбеген азаматтар арасынан тәуелсіз бақылаушыларды жалдау науқанын жүргізбеген. Қазір кез келген қоғамдық ұйым сайлауды бақылай алатын болса, енді жарғыда тиісті тармағы бар ұйымдар ғана бақылауға жіберіледі.
«Тек тәжірибесі бар және онымен кәсіби түрде айналысатын ұйымдарды ғана бақылауға алу тәртібі бұрыннан бар. Ал шетелден қаржыланатын ҮЕҰ аккредитациялау мәселесі пікірталас тудырып отыр. Тәуелсіз бақылаушылар – сайлау процесінің өте маңызды бөлігі және сайлауды бақылау шынымен бейтарап болуы керек және еш жағдайда шетелдік қаржыландыруға да, үкіметке де, жеке тұлғаға да тәуелді болмауы керек. Біз бұл нормаларды Мәжілісте заң жобасы бойынша жұмыс кезінде талқылап, түсініктеме береміз», - деді ҚР Парламенті Мәжілісінің Заңнама және сот-құқықтық реформа комитетінің хатшысы Снежанна Имашева.
Сайттағы қоғамдық талқылау 28 шілдеге дейін жалғасады. Осыдан кейін ғана заң жобасы ҚР Парламенті Мәжілісіне түседі.