Елімізде жыл басынан бері 1951 қызылша жағдайы тіркелді, деп хабарлайды Aqshamnews.kz тілшісі.
Үкіметтің баспасөз қызметінің мәліметінше, былтыр қызылшаға шалдығу көрсеткіші 2024 жылмен салыстырғанда 85%-ға төмендеген. Дегенмен биылғы көрсеткіш алаңдатарлық деңгейде қалып отыр. Аурудың ең жоғары таралуы Астана және Алматы қалаларында, сондай-ақ Жамбыл мен Атырау облыстарында байқалған.
Науқастардың басым бөлігі – бес жасқа дейінгі балалар. Олардың арасында екпе алмағандар, соның ішінде вакцинадан бас тартқан отбасылардың балалары көп.
Жиын барысында өңірлердегі эпидемиологиялық ахуал қаралып, вакцинациямен қамту мәселесіне ерекше назар аударылды. Маңғыстау облысында негізгі екпелер бойынша жоспарлы көрсеткіштерге қол жеткізілмегені атап өтілді.
Қорытындылай келе, аймақтық штабтарға қызылша бойынша жағдайды күнделікті бақылау, бастапқы медициналық буында түсіндіру жұмыстарын күшейту және халық арасында иммундаудың маңызын насихаттауды жандандыру тапсырылды.