Елімізде әлемге әйгілі актер Джеки Чан мен танымал америкалық продюсерлердің қатысуымен бірқатар халықаралық киножоба қолға алынып жатыр. Бұл туралы Үкімет отырысында Salem Entertainment цифрлық медиа компаниясының бас директоры Игорь Цай мәлімдеді, деп хабарлайды aqshamnews.kz.
– Біздің компания сериалдар түсіруге басымдық береді, жылына 12-ден астам сериал және 4 толық метражды фильм түсіреміз. Биыл Джеки Чан, америкалық «Оскар» иегері продюсерлермен бірлескен продюсерлік жоба іске қосылды, сондай-ақ жасанды интеллект технологиясына негізделген контент жасау бойынша Тимур Бекмамбетовпен бірегей жоба қолға алынды. Сонымен қатар Мәдениет және ақпарат министрлігінің қолдауымен, «Қазақтелеком» және TV+ брендімен серіктестікте біз 700 мың ақылы жазылушыға қол жеткіздік. Біз жыл сайын YouTube платформасымен жұмыс істеп, жылына 400 миллионнан астам қаралым жинаймыз, – деді Игорь Цай Үкімет отырысында.
Айта кетсек, былтыр отандық кино өндірісі 58 пайызға артты. Премьер-министр кино туындылардың санын көбейтіп, тек пайда түсіруді ғана мақсат етпей, фильмдердің сапасына баса назар аудару керектігін баса айтты.