Денсаулық сақтау вице-министрі балалар арасында вирус өршіп жатыр деген ақпаратқа жауап берді, - деп хабарлайды Aqshamnews.kz тілшісі.
Әлеуметтік желіде балалар арасында белгісіз вирус тарап, инфекциялық стационарларда бос орын қалмады деген ақпараттар тарады. Денсаулық сақтау вице-министрі Тимур Мұратов бұл мәліметті жоққа шығарды, бірақ инфекциялық бөлімшелердегі пациенттер саны расымен артқанын растады.
Вице-министрдің айтуынша, бұл – күз және көктем мезгілдеріне тән маусымдық құбылыс.
"Бұл - өтпелі кезең. Климаттық жағдайы ұқсас елдердің бәрінде дәл осы уақытта вирустық аурулардың өсуі байқалады. Дегенмен, биылғы жедел респираторлық вирустық инфекциялар деңгейі былтырғы маусымнан жоғары емес", - деді Мұратов Үкіметтегі баспасөз мәслихатында.
Оның сөзінше, биыл тұмау жағдайлары да аз тіркеліп жатыр.
"Кейбір балалар инфекциялық ауруханаларында және ересектер стационарларында уақытша жүктеме артқан. Егер науқастар бір мезетте көптеп түссе, жүйеге түсетін салмақ та өседі. Иә, ірі қалаларда пациенттер саны көбейгені байқалады, бірақ бұл - эпидемиялық жағдай емес. Бүгінгі таңда елде эпидемиологиялық қауіп жоқ", - деп сендірді вице-министр.