2028 жылдан бастап SOS батырмасы жоқ көліктер Қазақстанда тіркеуге алынбайды, деп хабарлайды Aqshamnews.kz тілшісі Informburo арнасына сілтеме жасап.
Өнеркәсіп және құрылыс министрлігінің мәліметінше, жаңа талап Кеден одағының техникалық регламентіне сәйкес енгізілмек. Ереже Еуразиялық экономикалық одаққа мүше елдердің барлығына ортақ болады.
Мәселен, Ресей мен Қырғызстаннан әкелінетін көліктерге шекарадан өтпей тұрып төтенше жағдай кезінде шұғыл қызметтерге автоматты түрде белгі беретін SOS жүйесі орнатылуы тиіс. Егер аталған жүйе болмаса, мұндай көліктерді Қазақстан аумағында пайдалануға әрі тіркеуге рұқсат берілмейді. Сондай-ақ сатылым кезінде де осы талап ескерілуі қажет. Ал ел ішінде бұрыннан жүрген автокөлік иелеріне SOS батырмасын орнату міндеттелмейді.
"Қазақстандықтар көлікті Кеден одағына мүше мемлекеттерден сатып аларда оның техникалық регламентке сәйкестігін алдын ала тексеріп алғаны жөн. Егер көлік талапқа сай келмесе, оны тіркеуге қою мүмкін емес. Мұндай жағдайда көлікті қайта алып кетуге тура келеді. Бұл – қосымша шығын және қайта экспорттаудың өзі үлкен мәселеге айналуы мүмкін", – деді Qazautostandart автокөлік сарапшылары мен аудиторлар қауымдастығы заңды тұлғалар бірлестігінің президенті Ербол Сейпилов.