Режиссер Алина Мустафинаның «Пряники для её отца, моего прадеда, её деда» атты деректі фильмі Қазақстан кинотеатрларының прокатына жол тартады. Бұл туынды - мемлекет қолдауымен түсіріліп, шектеулі көрсетілім форматында коммерциялық кинотеатр прокатына шыққан алғашқы деректі фильм, – деп хабарлайды aqshamnews.kz тілшісі.
Фильм аптасына бір рет Астанадағы Eurasia Cinema, Алматы мен Шымкенттегі Kinoplexx кинотеатрларында көрсетіледі.
«Біз үшін фильмнің үлкен экранға дәл Қазақстанда шығуы айрықша маңызды. Бұл – жеке оқиғаны бөлісумен қатар, мемлекеттік қолдаумен түсірілген деректі киноның да өз көрерменін таба алатынын көрсету мүмкіндігі», – деп атап өтті фильм продюсері Еркежан Мақсұт.
Картина өзегінде – Қазақстандық үш әйелдің тағдыры: әжесі, анасы мен немересі. Олар Екінші дүниежүзілік соғыс кезінде қаза тапқан арғы ата, әке және атаның Польша еліндегі жерленген орнына сапар шегеді. Фильм роуд-муви форматында түсіріліп, отбасылық жады, түп-тамырды іздеу, ұлттық болмыс пен ұрпақтар сабақтастығы тақырыптарын арқау етеді.
Фильмді UVENT Production кинокомпаниясы өндірген. Жобаның продюсерлері – Ақжол-би Сәрсембаев және Еркежан Мақсұт. Фильм Қазақстан Республикасы Мәдениет және ақпарат министрлігінің және Ұлттық киноны қолдау мемлекеттік орталығының қолдауымен жүзеге асырылды.
Фильмнің әлемдік премьерасы 2024 жылдың күзінде Busan International Film Festival (Оңтүстік Корея) аясында өтті. Премьерадан кейін картина бірқатар халықаралық фестивальдерде көрсетіліп, кәсіби мойындауға ие болды. Атап айтқанда, Cinema Verite (Иран) фестивалінде Гран-при жүлдесін, Bastau Film Festival аясында Президент жүлдесін, Ақтауда өткен «Қорқыт Ата» халықаралық кинофестивалінде үздік деректі фильм аталымы бойынша бас жүлдені, сондай-ақ Asian American International Film Festival фестивалінде мен Sikay Tang Critical Lens Award марапаттарын иеленді.