Kazakh Invest баспасөз қызметінің хабарлауынша, Zhabyak компаниясы мен Senko Farm жапон нарығына жылқы мен жылқы етінен өнім экспорттауды көздейтін меморандумға қол қойған, деп хабарлайды aqshamnews.kz
Құжат тұрақты жеткізілімдер жасауды, сонымен қатар экспорттық операцияларға байланысты ұйымдастырушылық және логистикалық мәселелерді үйлестіруді қамтиды.
Келісімде қазақстандық тарап Жапонияның қатаң ветеринариялық және санитариялық талаптарын ескереді. Сапа, қадағалау және сертификаттау стандарттарын сақтап, қазақстандық өнімнің жапон нарығына кезең-кезеңімен жеткізілуін қамтамасыз етеді.
– Біз бұл келісімге қол жеткізу үшін 5 жылдан аса уақыт бойы жұмыс істеп келеміз. Осы уақыт аралығында біз өндіріс процестерін бейімдеу, барлық қажетті рұқсатты алу және жапон нарығы талап ететін сертификаттауға қол жеткізу бойынша ауқымды жұмыс атқардық. Senko Farm-мен меморандумға қол қою – маңызды кезең, ол қазақстандық жылқы етінің әлемдегі ең талапшыл нарықтардың біріне қол жеткізуіне мүмкіндік береді және өнімдеріміздің бәсекеге қабілеттілігін растайды, – дейді "Zhabyak" ЖШС негізін қалаушы Игорь Жабяк.
Еске салайық, аталған меморандумға қол қою ел Президенті Қасым-Жомарт Тоқаевтың Токиоға ресми сапарының қорытындысы бойынша өтті.