Қазақстан ерлер құрамасы су добынан Қытайдың Санья қаласында өтіп жатқан 2026 жылғы жағажайдағы Азия ойындарын қола медальмен аяқтады, – деп хабарлайды aqshamnews.kz тілшісі.
Команда капитаны Сұлтан Шонжігітов жарыс қорытындылады.
"Жарыс өте жоғары деңгейде ұйымдастырылды. Әрине, біздің мақсат - алтын медаль алу еді. Бірақ оған қол жеткізе алмадық. Дегенмен жарыс алдында қойылған міндетті орындап, қола жүлдегер атандық. Барлық қарсылас командаларға тартысты ойындар үшін алғыс айтамын.
Ашық суда өтетін бәсекелер спортшылар үшін де, жанкүйерлер үшін де қызық деп ойлаймын. Сол себепті бұл спорт түрі алдағы уақытта кеңінен дамиды деп сенемін", - деді спортшы.
Еске салсақ, Саньяда су добы бәсекелері айналмалы жүйе бойынша өтті. Яғни әр команда бір-бірімен кездесті. Қазақстан құрамасы алғашқы екі ойында Таиланд пен Гонконгты жеңді. Кейін Иран мен Қытайға есе жіберді. Ал шешуші матчта Оңтүстік Кореяны ұтып, жарысты үшінші орынмен аяқтады.
Жағажай Азиадасында Қазақстан намысын Темірлан Балфанбаев, Сұлтан Шонжігітов, Мұрат Шәкенов, Эдуард Цой, Руслан Ахметов, Александр Еремин және Алдияр Әкімбай қорғады.