Будапеште өтіп жатқан Шахмат Олимпиадасында әлемнің ең үздік командасы атану үшін шахмат бәсекелері жалғасуда. Алтыншы турдың нәтижесі бойынша Қазақстанның әйелдер құрамасы 12-орыннан 6-орынға көтерілді, деп хабарлайды aqshamnews.kz.
Ерлер құрамасы әзірге қыздардың жетістігіне жете алмай келеді. Олар 39-орыннан 35-орынға көтерілді.
Қазіргі уақытта шахмат олимпиадасында көшбасшы ретінде Үндістанның әйелдер және ерлер құрамалары алты матч бойынша жеңімпаз ретінде ерекшеленіп отыр. Вьетнам, Қытай және Иран командаларының 5 жеңісі және 1 тең ойыны бар.
18 қыркүйекте өтетін 7-турда Қазақстан командалары Әзербайжан құрамасымен кездеседі.
45-ші шахмат олимпиадасы 11-22 қыркүйек аралығында Будапеште өтіп жатыр. Турнир швейцариялық жүйе бойынша 11 турдан тұрады, әр матч 4 партиядан құралған және классикалық уақыт бақылауы қолданылады. Ашық турнирге 197 команда қатысуда.