Қазақстанға АЭС не үшін керек? Оның қандай тиімді тұстары бар?
Қазақстанның BAYTAQ жасылдар партиясының төрағасы Азаматхан Әміртайдың айтуынша, заманауи атом электр станциялары (АЭС) қауіпсіз әрі қолайлы энергия көзі болып табылады. Бұл туралы ол қоғамға арнап жасаған үндеуінде айтты, деп хабарлайды aqshamnews.kz
АЭС салу тақырыбына қатысты қоғамдық талқылау бүгін аяқталды. Бұл мәселе қоғамда қызу пікірталас тудырып, пікірлер екіге бөлінді. А. Әміртайдың пікірінше, қазіргі таңда қолданылып жүрген көмір энергиясы экологияға кері әсерін тигізуде. Ол Қазақстанның экологиялық таза өндіріс пен қоршаған ортаны қорғау мақсатында АЭС салудың маңыздылығын атап өтті.
"Біздің мақсатымыз – елімізде таза ауа мен таза суды қамтамасыз ету, экологиялық таза өндірісті қалыптастыру. Әлемде таза, жасыл энергия көзі ретінде атом энергиясы танылған. Дамыған елдер бұған әлдеқашан көз жеткізген. Себебі климатты тұрақты ұстап қалу және қоршаған ортаны қорғау мәселесін тек атом электр станциясы арқылы қамтамасыз етуге болады," - деді Азаматхан Әміртай.
Бұл пікірлер Қазақстанда АЭС салу мәселесін қайтадан күн тәртібіне шығарды. Әміртайдың айтуынша, елдің энергетикалық болашағын қамтамасыз ету үшін АЭС салу қажетті және орынды шешім болып табылады.