Қауіпсіздік, салауатты өмір салты және өз болашағына жауапкершілікпен қарау мәселелеріне ерекше назар аударылды, деп хабарлайды aqshamnews.kz тілшісі.
Қазақстан Республикасы Ішкі істер министрлігінің Есірткі қылмыстарына қарсы іс-қимыл комитетінің және Алматы қаласы Полиция департаменті Есірткі қылмыстарына қарсы іс-қимыл басқармасының өкілдері №175 «Жаңа ғасыр» гимназиясында жаңа оқу жылының басталуына арналған салтанатты жиынға қатысты.
Іс-шара барысында ҚР ІІМ Есірткі қылмыстарына қарсы іс-қимыл комитетінің 2-басқармасының бастығы оқушылар алдында сөз сөйлеп, мектеп оқушыларын жаңа оқу жылының басталуымен құттықтады және оларға оқуда табыс, жаңа жетістіктер мен алға қойған мақсаттарына нық қадам басуды тіледі.
Сөз сөйлеу барысында қауіпсіздік, салауатты өмір салты және өз болашағына жауапкершілікпен қарау мәселелеріне ерекше назар аударылды. Оқушыларға дұрыс таңдау жасаудың, теріс ықпалдарға қарсы тұра білудің және құқыққа қайшы әрекеттерге тартылуға жол бермеудің маңыздылығы түсіндірілді.
Салтанатты жиыннан кейін қызметкерлер оқушылармен еркін форматта кездесіп, олардың сұрақтарына жауап берді және жасөспірімдер үшін өзекті мәселелер бойынша пікір алмасты.
Мұндай кездесулер профилактикалық маңызды ақпаратты жеткізіп қана қоймай, жастармен сенім мен өзара құрметке негізделген ашық диалог орнатуға мүмкіндік береді.
Әр баланың қауіпсіз әрі лайықты болашақты таңдау мүмкіндігін қамтамасыз ету – біздің ортақ міндетіміз.