Алматыда тұрғын үй секторындағы қоғамдық тәртіп пен қауіпсіздікті қамтамасыз етуге бағытталған "Қауіпсіз аула" жедел-профилактикалық іс-шарасы жалғасуда.
Іс-шараның екі күні ішінде полиция қызметкерлері тұрғылықты мекенжайлары бойынша есепте тұрған 2 105 адамды тексерді,- деп хабарлайды aqshamnews.kz.
Нәтижесінде 14 азаматқа қатысты сот шешімімен мінез-құлқына ерекше талаптар белгіленіп, оның ішінде алкогольдік ішімдіктерді тұтынуға тыйым салынды. Сонымен қатар алкоголь өнімдерін заңсыз сату деректері бойынша 29 құқық бұзушы жауапкершілікке тартылды. Қоғамдық орындарда алкогольдік ішімдіктер ішкені үшін 152 азаматқа қатысты шара қолданылды.
— "Қауіпсіз аула" жедел-профилактикалық іс-шарасының басты мақсаты — құқық бұзушылықтардың алдын алу және аулалар мен тұрғын массивтерде қауіпсіз ортаны қалыптастыру. Біз есепте тұрған тұлғалармен жүйелі түрде жұмыс жүргізіп, алкоголь өнімдерінің заңсыз айналымын және қоғамдық тәртіпті бұзу фактілерін дер кезінде тоқтатудамыз. Мұндай шаралар ықтимал қауіп-қатерлерді ерте анықтауға және ауыр құқық бұзушылықтардың алдын алуға мүмкіндік береді, — деді Алматы қаласы полиция департаменті қоғамдық қауіпсіздік басқармасының бастығы Асхат Құлбаев.