2024 жылғы деректерге сәйкес, Алматыда 500-ден астам кәуапхана, 417 монша кешені (заңды тұлғалар) және жекеменшік секторда 12 мыңнан астам монша жұмыс істеген, - деп хабарлайды Aqshamnews.kz.
Моншалардан бөлінетін шығарындылар көлемі жылына шамамен 4 мың тонна, оның ішінде жеке сектордағы моншалардан шығатын қалдықтар қоғамдық моншаларға қарағанда 2 есе көп. Бұл туралы Алматы қаласының Экология және қоршаған ортаны қорғау басқармасының сарапшысы Назия Аухинова айтты.
«Шағын және орта бизнес өкілдері қызметінің тұрақты болуы үшін экологиялық шектеулерді сақтап, шығарындылардың тұрақты көздеріне сүзгілер орнату бойынша санитарлық-эпидемиологиялық талаптарды орындау қажет екенін түсінуге тиіс. Қатты отын жағатын шағын ғана кәуапхана немесе монша маңайдағы ауа кеңістігін ондаған, тіпті жүздеген метрге дейін ластап, ең алдымен сол маңдағы тұрғындарға қолайсыздық тудырады. Сондықтан ең тиімді қолжетімді технологияларға көшу, яғни газ отынына не электрге ауысу және тиімді сүзгілер орнату қажет», – деді ол.
Еске салайық, бүгін мәслихат депутаттары Алматы қаласының атмосфералық ауасын қорғау бойынша жаңа ережелерді бекітті. Бұл ережелер Қазақстанда алғаш рет енгізіліп отыр және мегаполис ерекшеліктерін ескере отырып, ластанудың негізгі көздерін реттейтін бірыңғай кешенді тетік қалыптастырады.