Қазақстанда онкологиялық ауруларды диагностикалау және емдеу тегін медициналық көмектің кепілдік берілген көлеміне (ТМККК) кіреді.
Осылайша, барлық онкологиялық пациенттер – Қазақстан азаматтары МӘМС мәртебесіне қарамастан онкологиялық ауруларды тегін емдеуге құқылы.
Онкологиялық пациенттерді дәрі-дәрмекпен қамтамасыз ету, диагностикалау және емдеу мемлекет тарапынан төленеді. Тегін медициналық көмектің кепілдік берілген көлемі (ТМККК) шеңберінде пациентке ештеңе төлеудің қажеті жоқ, деп хабарлайды aqshamnews.kz.
Егер пациент онкологиялық және гематологиялық ауруға күдіктенсе, МСАК-та (емханаларда) пациенттерге 18 жұмыс күні ішінде консультация алуға және тексеруден өтуге мүмкіндік беретін «жасыл дәліз» бағыты енгізілді.
Қазіргі уақытта Қазақстан халқы үшін онкологиялық скринингтің 3 түрі бар:
1) сүт безі обырына скрининг (40 жастан 70 жасқа дейінгі әйелдер, 2 жылда 1 рет)
2) жатыр мойны обырына скрининг (30 жастан 70 жасқа дейінгі әйелдер, 4 жылда 1 рет)
3) колоректалдық обырға скрининг (50 жастан 70 жасқа дейінгі ерлер мен әйелдер, 2 жылда 1 рет).
Онкологтар қазақстандықтарды емханаларда үнемі тегін онкологиялық скринингтерден өтуге шақырады.
Егер онкологиялық ауруға күдік болса, дереу тұрғылықты жері бойынша өз емханасына, сондай-ақ тұрғылықты жері бойынша онкологиялық орталыққа (онкодиспансерге) жүгіну қажет.