Қазақстан Президенті Қасым-Жомарт Тоқаев Қазақстан халқы Ассамблеясының ХХХІV сессиясында сөйлеген сөзінде қоғамның бірлігі мен тұрақтылығына төнуі мүмкін қауіптерге тоқталып, ел ішіндегі популистік ұрандар мен деструктивті әрекеттерге қатаң қарсы тұру қажет екенін мәлімдеді. Бұл туралы Aqshamnews.kz сайты хабарлайды.
Мемлекет басшысы қазіргі күрделі геосаяси және экономикалық жағдайды өз мүддесіне пайдаланғысы келетін кейбір жеке тұлғалар мен саяси авантюристерге ескерту жасады.
"Қазіргі күрделі жағдайды жеке мүддесіне пайдаланғысы келетін түрлі популистер мен саясаткерсымақтар бар. Ел мүддесіне қастық ойлаған ондай адамдарға тұтас қоғам болып қарсы тұруымыз керек", – деді Тоқаев.
Президенттің бұл мәлімдемесі ел ішіндегі тұрақтылық пен қоғамдық келісімді сақтау үшін әрбір азаматтың жауапкершілігін арттыру қажеттігін меңзейді.
Тоқаев Қазақстанды алда оңай емес кезең күтіп тұрғанын ашық айтты. Дегенмен, бұл қиындықтарды еңсеруге халықтың қабілеті мен мемлекеттің дайындығы жеткілікті екенін баса айтты.
"Алда күрделі кезең келе жатыр. Оңай болмайды. Бірақ алаңдауға еш негіз жоқ", – деді ол.
Президент үнемі қайталайтын бір ұстанымын тағы да атап өтті: "Бұл қиындық та артта қалады." Бұл сөз – халыққа сенім мен үміт ұялататын нақты бағдар болмақ.
Мемлекет басшысы кез келген дағдарыс жаңа мүмкіндіктерге жол ашатынын атап өтті. Сондықтан қазіргі сын-қатерлерге қарсы тұрып қана қоймай, олардан даму бағыттарын таба білу маңызды.
"Кез келген ауқымды дағдарыстан кейін зор мүмкіндіктерге жол ашылады. Сол мүмкіндіктерді дер кезінде әрі дұрыс пайдалану қажет", – деді Тоқаев.
Ол ел ретінде жинақы болып, нақты нәтижеге бағытталған мақсаттарды көздеу керектігін баса айтты. Бұл – мемлекет пен қоғамның келешекте табысқа жетуінің басты шарты.