Бүгін Астанада Үкіметтің кеңейтілген отырысында Мемлекет басшысы Қасым-Жомарт Тоқаев Қазақстанның жаңа жаһандық өзгерістер мен технологиялық дәуірге дайындығы туралы айтты. Президент әлемдегі күрделі ахуалдың еліміздің экономикасы мен тұрмыс сапасына тікелей әсер ететінін атап өтті.
– «Қазір дүние жүзі түбегейлі өзгеріске ұшырап жатыр. Жаһандық үдерістер, ең алдымен, еліміздің экономикалық ахуалына әсерін тигізетіні анық. Біз соған міндетті түрде дайын болуымыз керек. Жаңа технологиялық ахуалға сақадай сай тұруымыз қажет. Бұл еліміздің бәсекеге қабілетін арттырып, тұрақты дамуына жол ашатын аса маңызды фактор», – деді Қасым-Жомарт Тоқаев.
Президенттің айтуынша, Үкімет пен әкімдердің жұмысының нәтижесі экономиканың даму көрсеткіштері мен халықтың тұрмыс сапасынан көрінеді. Мемлекет басшысы өткен жылдың негізгі міндеттерінің орындалуын талқылап, алдағы өзекті мәселелерді шешу жолдарын айқындауды тапсырды.