Қазақстан Президенті Қасым-Жомарт Тоқаев Қазақстан халқы Ассамблеясының ХХХІV сессиясында сөйлеген сөзінде конструктивті сын мен деструктивті арандатудың аражігін ажыратып, мемлекеттің ішкі істеріне сыртқы ықпал ету әрекеттеріне қарсы нақты ұстанымын білдірді. Бұл туралы Aqshamnews.kz сайты хабарлайды.
Президент ел ішінде сөз еркіндігі мен конструктивті пікірталастың маңызын жоққа шығармай, сонымен қатар оны арандату мен қоғамдық тұрақтылықты бұзу мақсатында қолдануға жол берілмейтінін атап өтті.
"Күріш пен күрмекті, конструктивті сын мен дәлелсіз мін тағуды, көңілге тимейтін пародия мен жиіркенішті қорлауды айыра білу маңызды. Заң алдында бәрі тең", – деді Мемлекет басшысы.
Ол этносаралық келісім мен бейбітшілікке нұқсан келтіретін кез келген әрекет заңмен қатаң жазаланатынын ескертті. Мұндай арандату әрекеттеріне қазірдің өзінде тосқауыл қойылып келеді және бұл ұстаным алда да сақталады.
Тоқаев өзін сөз бостандығының жақтаушысы ретінде көрсетіп жүрген кейбір блогерлер мен құқық қорғаушылар шын мәнінде сыртқы күштердің мүддесіне қызмет етіп жүргенін мәлімдеді.
"Еліміздегі әр істен саяси, жағымсыз астар іздеп, шын мәнінде, арандатумен айналысып жүргенін айтпасқа болмайды. Бұл – Қазақстаннан көшіп кетіп, шетелде жүріп халқымызға шабуыл жасайтын, тіпті мемлекеттік органдарды бопсалайтын бұрынғы азаматтарымыздың әрекеті", – деді Президент.
Ол мұндай тұлғалардың шет мемлекеттерден алған қаржыны ақтау мақсатында әрекет етіп жүргенін атап өтті. "Бүгінде мұны бәрі біледі. Демократияны біреудің қаржысымен орнатуға болмайды", – деді Тоқаев.