Алматы облысына қарасты Қаскелең қаласындағы мектептердің бірінде 9-сынып оқушысы көз жұмғаны туралы ақпарат тарады, деп хабарлайды Aqshamnews.kz тілшісі.
Желіде жарияланған мәліметке сәйкес, оқушы сабақ арасындағы үзіліс кезінде өзін жайсыз сезінген. Сол сәтте бірден жедел жәрдем шақырылып, жақындарына хабарланған. Оқушының жанында аталған мектепте мұғалім болып жұмыс істейтін әжесі де болғаны айтылды.
Оқиға орнына жеткен дәрігерлер реанимациялық көмек көрсеткенімен, жасөспірімді аман алып қала алмады. Ол сол жерде қайтыс болған. Мәлімет бойынша, оқушы ақпан айының аяғында 16 жасқа толатын еді.
Қазір өлімнің нақты себебі анықталып жатыр. Сот-медициналық сараптамасы тағайындалған.
Алматы облыстық полиция департаменті оқушының қайтыс болғанын растады.