Қарағандыда полиция балалар мекемесінің тәрбиеленушілерінен ақша бопсалаумен айналысқан ұйымдасқан топтың әрекетін әшкереледі, деп хабарлайды Aqshamnews.kz тілшісі Polisia.kz-ке сілтеме жасап.
Мәліметке сәйкес, 8 қаңтарда ұйымдасқан қылмысқа қарсы күрес басқармасының жедел қызметкерлері прокуратурамен бірлесіп, әлеуметтік осал санаттағы азаматтарға арналған арнайы мемлекеттік төлемдерден ақша бопсалауға қатысы бар топты анықтаған. Жедел іс-шаралар кезінде өңірдегі балаларға арналған мекемелердің бірінің тәрбиеленушілері қылмыскерлердің құрбаны болғаны белгілі болды.
Алдын ала дерек бойынша, соңғы жарты жылда күдіктілер алдау, қорқыту және күш қолдану арқылы бірнеше жәбірленушіден 10 млн теңгеден астам қаражат иемденген. Олар балаларды арнайы шоттардан ақша шешуге және микроқаржы ұйымдарында несие рәсімдеуге мәжбүрлеген.
Тінту барысында күдіктілерден автоматты атыс қаруына арналған оқжатарлар және жүзден астам оқ-дәрі тәркіленген. Аталған факті бойынша бопсалау белгілерімен сотқа дейінгі тергеу басталып, барлық күдіктілер ұсталды. Оларға 10 жылға дейін бас бостандығынан айыру жазасы қаупі төніп тұр.
