Қарағанды облысында жоспарлы оқу-жаттығу ұшулары барысында Су-30СМ жойғыш ұшағы апатқа ұшырады, – деп хабарлайды aqshamnews.kz тілшісі.
Оқыс оқиға 25 ақпанда болды. Бұған қатысты Қорғаныс министрлігі ресми мәлімдеме жасады.
Ведомство мәліметінше, ұшақ экипажы дер кезінде катапульт жасады. Ұшқыштар аман, олардың өмірі мен денсаулығына қауіп жоқ. Қазір медициналық мамандардың бақылауында.
Ұшақ құлаған аумақ қоршауға алынды. Тұрғындар мен инфрақұрылым нысандарына еш қауіп жоқ. Оқиғаның себептері мен мән-жайын анықтау үшін Қазақстан Республикасы Қорғаныс министрлігінің арнайы комиссиясы құрылды. Комиссияны ұшу қауіпсіздігі жөніндегі департамент басқарады. Құрамына авиациялық қызметтің арнайы мамандары кірді.
Тергеу қорытындысы бойынша құқықтық баға беріліп, процессуалдық шешім қабылданады, – делінген Қорғаныс министрлігінің хабарламасында.