Алматының бірнеше ауданында ағаш отырғызылды
19 наурыз – Жаңару күні. Жаңа форматта тойлана бастаған мерекенің алтыншы күнін алматылықтар ағаш отырғызу жұмыстарымен жалғастырды. Бұл күні Алматының бірнеше аудандарында ағаш егілді, деп хабарлайды аlmaty-akshamy.kz.
Жаңару күніне орай ұйымдастырылған іс-шараның бірі – Наурызбай ауданындағы «Шұғыла» ықшамауданындағы №200 мектеп-гимназияда өтті. Мектеп директоры Айнұр Нұрымқызы өзі оқушылармен бірге жүріп, мектеп ауласына 50 түп шырша, 50 түп тұя ағаштары отырғызды.
– Туған жерге, Отанға деген сүйіспеншіліктерін арттыруға, экологиялық білімді қалыптастыру мен табиғатты қорғауға баулуды мақсат ететін шараның жас ұрпаққа берері мол. Бұл шараға мектеп ұжымы бір кісідей атсалысып, сауабы мол істе белсенділік танытты, – дейді директордың тәрбие ісі жөніндегі орынбасары Ақмарал Салқынбекова.
Шара барысында «Қара жорға» биінен флешмоб, бірнеше спорт түрлерінен жарыс өтті. Игілікті іске атсалысқандар ұйымдастырушылар әзірлеген бауырсақ пен наурыз көжеден дәм татып, үйлеріне арқа-жарқа көңіл-күймен тарқасты.
