Алматының Самғау ықшамауданында тұрғындарды алаңдатқан оқиға тіркелді, - деп хабарлайды Aqshamnews.kz.
Құрбыларымен серуендеп жүрген жас қыздар әткеншектің астында жатқан үлкен қапты байқап, бастапқыда оны қоқыс деп ойлаған. Олар қаптың үстіне отырып, аяқтарымен тепкілегенімен, ешқандай қозғалыс байқалмаған. Түнгі уақытта балалар алаңының жанында қаптың ішінде жатқан ер адамның видеосы әлеуметтік желіде тарап жүр.
Бірнеше минуттан кейін қасынан өтіп бара жатқан басқа қыздар: «Қараңдаршы, ішінде адам жатыр ғой» деп ескерткенде ғана жасөспірімдер шошып қалған. Олар біраз уақыт осы маңда отырғаннан кейін жолдан өткен жігіттен қапты ашуды сұрайды. Сол сәтте қаптың ішінен кенеттен адамның дауысы шығады.
«Мен сендерге кедергі жасап тұрмын ба?» – деген ер адамға қыздар «иә» деп жауап бергенде, ол: «Онда әрі қарай теуіп отыра беріңдер» деп жауап қатқан. Қорыққан қыздар қаша жөнелген.
Жасөспірімдердің бірі полицияға қоңырау шалып, тәртіп сақшылары 15 минут ішінде оқиға орнына жеткен. Дәл осы кезде қаптағы ер адам сыртқа шығып, қашпақ болғанымен, полиция қызметкерлері оны қуып жүріп ұстаған.
Оқиғаға байланысты Aqshamnews.kz Алматы қалалық Полиция департаментінің Баспасөз қызметінен түсініктеме алды.
«7 қыркүйек күні ер адам полиция қызметкерлерімен Алатау аудандық полиция басқармасына жеткізілді. Оның айтуынша, қатты шаршағандықтан ұйықтап қалған. Қоғамдық тәртіпті бұзғаны үшін ол әкімшілік жауапкершілікке тартылды», – делінген Полиция департаментінің хабарламасында.
Қалалық полиция департаменті тұрғындарды қырағы болуға шақырып, күмәнді жағдайлар туындаған кезде дереу 102 нөміріне хабарласуды ескертті.