Алматыда ұрланған қаруды полицейлер Жетісу облысындағы зираттың маңынан тапты, деп хабарлайды Almaty-akshamy.kz Inbusiness.kz-ке сілтеме жасап.
Полиция қызметкерлерінің мәліметінше, қарашаның 11-і күні Жетісу облысы ІІД Ұйымдасқан қылмысқа қарсы күрес басқармасының жедел қызметкерлері ІІД-нің көмегімен Көксу ауданындағы Мұқыры асуы маңында жасырылған қару қоймасын анықтады.
Атап айтқанда, ол жерден екі ойық ұңғылы қару мен әртүрлі қару-жарақтың 300-ден аса оқ-дәрісі, сондай-ақ оқ өткізбейтін кеудешелер табылды. Арнайы мәліметтер базасын тексере келе, табылған карабиндер мен оқ-дәрілердің қаңтар оқиғасы кезінде Алматыдағы қару сататын дүкендердің бірінен ұрланғаны анықталды.
Аталған факті бойынша Қазақстан Республикасы Қылмыстық кодексінің 287-бабының 3-бөлігі ("Қаруды, оқ-дәрілерді заңсыз алу, беру, өткізу, сақтау, тасымалдау немесе алып жүру") бойынша қылмыстық іс қозғалды. Тергеу облыстық тергеу басқармасының өндірісінде. Қазір тәркіленген қару сараптамаға жіберілді.