«Президенттің қолдауы – театр саласындағы барлық қызметкерлер үшін үлкен ынталандыру»: Абай атындағы ҚазҰОБТ директорының орынбасары
Ұлттық құрылтайдың IV отырысында Президент Қасым-Жомарт Тоқаев: «Театрлардың дамуы – кез келген елдің мәдени деңгейінің маңызды көрсеткіштерінің бірі» екенін атап өтті. Мемлекет басшысы бизнесті өңірлердегі театрларды қолдауға белсенді қатысуға шақырды.
Абай атындағы Қазақ ұлттық опера және балет театры директорының орынбасары Қанат Қаражанов Мемлекет басшысының бұл салаға көңіл бөлуін театр қызметкерлері үшін үлкен ынталандыру екенін атап өтті.
— Бұл бізге бұдан да белсендірек жұмыс істеуге, көрермендерді жаңа жобалармен қуанта түсуге жол ашады. Шын мәнінде, бүгінгі таңда театрға деген сұраныс артып келеді, адамдардың осы өнер түріне жақындасуға деген қызығушылығы артуда. Әсіресе, көрермендер арасында жастардың болуы қатты қуантады.
Президент театрлардың қажеттілігі мен өсіп келе жатқан танымалдығын ғана емес, сонымен қатар проблемалық мәселелерді де атап өтті. Мемлекет басшысы әртүрлі этностардың театрларын қолдауға, сондай-ақ өңірлердегі өнер ордаларына көмектесуге шақырды. Өйткені олардың көбінің жағдайы қиын. Президент театрларды дамытуда басымдықты өңірлерге беруге шақырды. Мемлекеттің осындай қолдауын сезіну – өте қуанышты әрі маңызды, – деді Қанат Қаражанов.