Бүгін Алматы қаласында бірқатар құрылыс және әлеуметтік нысандарда жоспарлы сенбілік өтті. Жұмыстар қалалық құрылыс басқармасына қарасты бірнеше маңызды алаңды қамтыды, – деп хабарлайды aqshamnews.kz тілшісі.
Қаланың әр ауданында жұмысшылар тырма мен қап алып, жаңа қоғамдық кеңістіктер салынып жатқан аумақтарды ретке келтірді. Атап айтқанда, Саялы шағынауданындағы даму және шығармашылық орталығы, Н. Сац атындағы мемлекеттік академиялық орыс балалар мен жасөспірімдер театрының қайта жаңғырту нысаны, болашақ дене шынықтыру-сауықтыру кешені, сондай-ақ Қалқаман шағынауданындағы №7 қалалық клиникалық аурухананы жаңғырту нысаны қамтылды.
Барлық алаңдағы негізгі міндет — жиналған қоқысты тазалап, аумақтарды келесі құрылыс кезеңіне дайындау болды.
Ең ауқымды жұмыстар Алтынсарин мен Шаляпин көшелерінің қиылысында жүргізіліп, мұнда шамамен 100 адам тазалық жұмыстарына шықты. Аумақ толықтай тазартылып, ретке келтірілді.
Саялы шағынауданында тазалық жұмыстарымен қатар алғашқы көріктендіру шаралары да атқарылды: гүлдер мен ағаш көшеттері егілді.
Сонымен қатар, жұмыстар қаланың әлеуметтік нысандарында да қатар жүргізілді. Атап айтқанда, Құрамыс шағынауданындағы 500 келушіге арналған емхана, Наурызбай ауданындағы өрт сөндіру депосы, Медеу ауданындағы №17 мектеп, Шұғыла шағынауданындағы емхана, Әйтеке би көшесіндегі емхана, Республикалық физика-математика мектебі, Райымбек батыр мемориалдық кешені, №56 гимназия және №2 перзентхананың жаңа корпусын салу нысанында сенбілік ұйымдастырылды.