Жанат АЙТІЛЕУ, Қала құрылысы кеңесінің мүшесі:
Сараптамалық қауымдастықпен бірлесе келе, қала құрылысы регламентінің жобасы қоғамдық талқылауға түсті.
Алматының 2040 жылға дейінгі Бас жоспарын іске асыру аясында қала әкімдігі жаңа қала құрылысы регламентін әзірледі. Құжат жобасы «Ашық НҚА» сайтында орналастырылған, жария талқылауға әркез ашық. Әлбетте, қала құрылысы регламентінің базалық нормасы желді аумақтың жаңартылған картасын, тұрғын үй ғимаратының биіктігінің нақты параметрін бекітуді, бизнесті дамытуға қажет тұрғылықты аудандағы бірінші қабатты пайдалану міндеттілігі мен басқа да мәселелерді көздейді.
Сапалы қала құрылысы регламентін әзірлеу мен қабылдау – маңызды әлеуметтік әрі әкімшілік міндеттің бірі. Олай болса, мұның нақты шешімі қысқа мерзімде Алматы қаласының тұрғындарына әлеуметтік, экономикалық, саяси және қоғамдық пайда әкелмек. Демек, бұл жағдай қаламызға жақын барлық өңірде экспоненциалды экономикалық өсудің мультипликативтік әсерімен тұрақты ұзақ мерзімді дамудың негізін қалауға қабілетті.
«Дөңгелек үстел» үрдісіндегі бұл басқосуда сарапшылар жаңа қала құрылысы регламентіне байланысты өзекті мәселелерді талқылады. Олардың пікірі мен ұсынысы қалалық инфрақұрылым мен халықтың қажеттілігіндегі қарқынды өзгеріс жағдайында ерекше мәнге ие. Атап айтқанда, талқылаудың маңызды аспектісі – экологиялық норманы, сейсмикалық қауіпсіздікті сақтау мен жайлы қалалық ортаны құру қажеттілігі.
«Қала құрылысы регламентінің жобасына қатысты қоғамдық талқылауда түйткілді біраз мәселе қамтылды. Көздеген мақсат – қала құрылысы регламентінің базалық нормаларының қатаң сақталуы. Осыған дейін де айтқанымыздай, қаламыздың әл Фараби даңғылының бойына 18-20 қабатты үйлер бой көтерген. Ендігі мақсат – аталған даңғыл бойына биіктігі 12 метрден (3 қабат) аспайтын үйлер ғана салу. Әл Фараби мен Абай даңғылдары аралығында салынатын ғимараттардың биіктігі 25 метрден (9 қабат) аспауы тиіс. Осындай қағидат қатаң сақталуы қажет. Қаламыздың болашағы, тұрғындардың қауіпсіздігі бізге инвесторлардың талабынан маңызды, – дейді Қала құрылысы кеңесінің мүшесі Жанат Айтілеу.