Алматыда өтіп жатқан референдумда өмір көрген, қазыналы қарттарымыз саяси науқанда белсенділік танытып, өз дауыстарын беріп жатыр.
Елімізде 90-нан асқан, 100-ге келген қарияларымызға үйде дауыс беру мүмкіндігі жасалғанына қарамастан, сайлау учаскелеріне арнайы келіп, бюллетеньді өздері толтырып, жәшікке өздері салып жатқан қарияларымыз да аз емес.
Солардың бірі – Алмалы ауданындағы №86 сайлау учаскесіне келген, 1934 жылы туған Әбіләкім Аубакиров.
90 жастағы ақсақал өмірінің саналы ғұмырында барлық саяси науқандарға белсенді атсалысып келе жатыр. Бүгін де сол әдетінен жаңылмай, өзі тіркелген №86 сайлау учаскесіне жұбайымен бірге келді. Әбіләкім ата кезінде Дінмұхаммед Қонаевпен бірге қызмет етіп, ел мүддесі үшін талай игі істерге атсалысқан.
– Димаш аталарыңмен бірге 15 жылдай қызметтес болдым. Ұлт мүддесін қорғауға келгенде ешкімге есе жібермеген сол тұлғаны өмірімнің үлгісі санаймын. Сендер де адал болыңдар! Ұлтқа адал қызмет етіңдер! Еңбектерің жемісті, өмірлерің келісті болсын! – деп, Әбіләкім ата сайлау учаскесінде қызмет етіп жүрген жандар мен дауыс беруге келген тұрғындарға ақ батасын берді. Сонымен қатар, ол алматылықтарды ел болашағына бей-жай қарамай, осы маңызды науқанға белсенді атсалысуға шақырды.