30 қыркүйекте футбол жанкүйерлерінің назарын аударатын үлкен кездесу өтпек. Қазақстанның танымал клубы "Қайрат" әлемдік алыптардың бірі "Реалмен" жасыл алаңда жолығады. Бұл ойынға спортсүйер қауым ғана емес, елдің саяси тұлғалары да қызығушылық танытып отыр. Аqshamnews.kz тілшісі Мәжіліс депутаттарынан матч туралы сұрап білді.
Аманжол Әлтай: "Жеңілсек те абырой"
Депутат Аманжол Әлтай "Қайраттың" Испания алпауыт клубына қарсы ойнайтынының өзі үлкен мәртебе екенін атап өтті.
"Мәселе "Қайраттың" "Реалды" жеңуінде емес. Ең бастысы – біздің командамыздың әлемнің ең мықты футбол ұжымдарының бірімен бір алаңда ойнауының өзі үлкен абырой. Сондықтан "Қайрат" жеңсе де, жеңілсе де біз үшін қуаныш. Болжам бойынша есеп 2:1 болуы мүмкін, бірақ "Реалдың" пайдасына. Егер 1:1 есебімен тең түссе, ол тіпті тамаша болар еді. Қалай болғанда да, "Қайратқа" жеңіс пен сәттілік тілейміз", – деді Аманжол Әлтай.
Ерлан Саиров: "Тең ойын – біз үшін жеңіс"
Ал Ерлан Саиров "Қайратқа" сәттілік тілеп, ойынның тең түскенін қалайтынын жеткізді.
"Қайратқа" сәттілік тілеймін. Дегенмен екі команданың салмақ дәрежесі әртүрлі екені белгілі. Сол себепті тең нәтиженің өзі Қазақстан футболы үшін үлкен жеңіс болмақ. Шын жүректен ойынның тең аяқталғанын қалаймын", – деді депутат Ерлан Саиров.
Еске салайық, кеше тарихи ойынға билет сатылымы ашылған еді. Кезекте 300 мыңға жуық адам тұрған.