Кипрден келген жанкүйерлер Алматының сұлулығына тәнті болып, «Қайрат» клубының жейдесін сатып алды. Бүгін Орталық стадионда өтетін алматылық «Қайрат» пен кипрлік «Пафос» арасындағы маңызды кездесу алдында стадион маңында қызу дайындық жүріп жатыр, - деп хабарлайды Аqshamnews.kz тілшісі.
Құқық қорғау қызметкерлері мен волонтерлермен қатар, стадион аумағында екі команданың жанкүйерлері де жиналып жатыр. Өз командасын қолдау үшін Алматыға Кипрдан да шетелдік жанкүйерлер келді.
Кипрлік жанкүйерлер Димитрис Астрос пен Переклис Завридис Алматыда алғаш рет екенін айтып, қаланың қонақжайлығы мен тазалығына, әсемдігіне ерекше әсер алғандарын жеткізді. Матч алдында олар «Қайрат» футбол клубының фирмалық дүкеніне кіріп, кәдесыйлар сатып алған. Олардың бірі алматылық клубтың жейдесін естелік әрі құрмет белгісі ретінде алғанын айтты.
"Біз Алматыда алғаш ретпіз, бұл қала бізді таңғалдырды. Мұнда өте әдемі, таза әрі адамдар мейірімді. Мен "Пафостың“ жеңісіне сенемін, бірақ "Қайрат“ та мықты қарсылас. Тіпті сіздердің тауларыңызға да барып үлгердім. Ұмытылмас әсер қалдырды!" - деді Димитрис Астрос.
Ал Переклис Завридис Алматыны заманауи әрі спортты сүйетін қала ретінде сипаттап, мұндағы ерекше атмосфераны атап өтті:
"Бұрын "Қайрат“ жайлы көп біле бермейтінмін, бірақ клуб Чемпиондар лигасына шыққаннан кейін қызығушылығым артты. Бүгін әдемі ойын күтемін. Алматы - таза, жайлы және өте жылы қала екен",- деді жанкүйер.
Алдағы матч тек спорттық бәсеке емес, түрлі елдің жанкүйерлерін біріктіретін мерекелік шара болмақ. Алматы тағы да спорт арқылы достық пен халықаралық ынтымақтастықтың қаласы екенін дәлелдеп отыр.
