Ресей Президенті Владимир Путин Қазақстан Президенті Қасым-Жомарт Тоқаевпен сенімді әрі достық қарым-қатынас орнатқанын мәлімдеді, деп хабарлайды almaty-akshamy.kz.
"Біз Қасым-Жомарт Кемелұлымен тұрақты байланыстамыз. Біз өте мейірімді, сенімді қарым-қатынас орнаттық. Қазір энергетика туралы айтатын болсақ, Өзбекстанға газ беріп қана қоймай, Солтүстік Қазақстанға да біздің энергия тасымалдаушыларымыз қажет. Иә, Қазақстан өзі өндіреді, бірақ соған қарамастан газбен жабдықтауды қажет ететін Қазақстанның ірі облыстары бар. Миллиардтаған долларға жаңа маршруттар салғаннан гөрі Ресейден газ алу оңай әрі арзан", – деді Путин.
Бұл мәлімдеме Санкт-Петербургте өткен жетекші әлемдік ақпараттық агенттіктердің басшыларымен кездесу барысында жасалды.
Путин екі ел арасындағы барлық дерлік векторлар бойынша өте белсенді бірлескен жұмыс жүріп жатқанын атап өтті. Оның айтуынша, бұл ынтымақтастық Президент Тоқаевтың арқасында мүмкін болып отыр.
"Президент Тоқаев біздің барлық бағыттар бойынша өзара іс-қимылымызды қолдайды", – деді ол.