Мемлекет басшысы Қасым-Жомарт Кемелұлы Тоқаев Ұлттық құрылтайдың IV отырысында ел дамуының стратегиялық бағыттарын айқындап, бірқатар маңызды бастамаларды жариялаған болатын. Енді осы бастамаларды жүзеге асыруға арналған кешенді жоспар Мемлекет басшысының қол қоюымен бекітілді.
53 тармақтан тұратын бұл құжат – Президент Әкімшілігі мен Үкіметтің бірлесіп әзірлеген жүйелі жоспары. Ол тек мемлекеттік органдарға ғана емес, бүкіл қоғамға арналған нақты бағдар болып табылады.
Аталған құжатта гуманитарлық және әлеуметтік-экономикалық бағыттар қамтылып отыр.
Гуманитарлық бастамалар аясында:
-
«Қазақстан балалары» атты бірыңғай бағдарлама әзірленеді;
-
Жаңа Ішкі саясат тұжырымдамасы қабылданады;
-
2026-2028 жылдарға арналған нашақорлық пен есірткі бизнесіне қарсы күрестің кешенді жоспары дайындалады;
-
Ұлттық цифрлық архив құрылып, тарихи мұрамыз заманауи форматта сақталады;
-
Театр өнерін дамыту мақсатында өңірлерде жаңа театрлар салынып, ұлттық театрларға қолдау көрсетіледі;
-
Абай институтының шетелде ашылуы – ұлттық мәдениетті халықаралық деңгейде ілгерілетудің маңызды қадамы болмақ;
-
Биологиялық әралуандықты қорғауға арналған халықаралық қор құрылады.
Ал әлеуметтік-экономикалық салаларда:
-
«Жайлы мектеп» жобасы жалғасып, үш жылда 1300 мектеп жаңғыртылады;
-
Ерекше қажеттілігі бар жандарға арналған оңалту орталықтары әр облыс орталығында ашылады;
-
Өңірлерді дамыту тұжырымдамасына жаңа тәсілдер енгізіледі;
-
Астана–Арқалық–Торғай–Ырғыз бағытымен Транскаспий халықаралық көлік дәлізіне шығатын автожолдар жаңғыртылады, Арқалықтағы әуежай қайта қалпына келтіріліп, жаңа аэровокзал кешені салынады;
-
Жыл сайын 200-ге жуық инвестициялық жобалар жүзеге асады.
Бұдан бөлек, шекара маңындағы аудандарды дамыту, ғылым қалашықтарын құру, ерекше қажеттіліктері бар балаларға кешенді қолдау көрсету, ҮЕҰ мен мемлекеттік әлеуметтік тапсырысты реттейтін заңдарды қабылдау жоспарланған.
Бұл – Президенттің ел болашағы үшін ұсынған нақты қадамдарға негізделген ұлттық даму стратегиясы. Барлық саладағы осындай жүйелі реформалар Қазақстанның ұзақ мерзімді өркендеуіне жол ашады.