Ертең, яғни 7 тамызда Алматы қаласы әкімдігінің және Қазақстан Республикасының Чех Республикасындағы Елшілігі, Прага қаласының мэриясы және Прага қаласы музейінің қолдауымен Алматы қаласы тарихы музейінің «Уақыт керуені» атты халықаралық көрме ашылады.
Ұйымдастырушы – Алматы қаласы музейлер бірлестігі мен Прага қаласы музейі. 2024 жылы екі музей арасында ынтымақтастық жөніндегі меморандумға қол қойылған болатын.
Қазақстан Республикасы мен Чех Республикасы арасындағы дипломатиялық қатынастар 1993 жылы 1 қаңтарда құрылды. Жыл өткен сайын екі ел арасындағы мәдени байланыс нығайып келеді. Ашылғалы отырған көрме – осы ынтымақтастықтың нақты көрінісі.
Көрменің мақсаты – Қазақстан Республикасы мен Чех Республикасы арасындағы мәдени байланыстарды одан әрі нығайту, сондай-ақ Ұлы дала халқының тарихы мен мәдениетімен – жалпы көшпенділер мәдениетімен, атап айтқанда көшпелі қазақтардың дәстүрлерімен, тұрмысымен, философиясымен және дүниетанымымен таныстыру.
Алматы қаласы тарихы музейінің «Уақыт керуені» көрмесі келушілерді Ұлы Даланы мекендеген халықтың терең тарихы мен мәдениетімен таныстырып, екі ел арасындағы мәдени диалогты жалғастырады. Көрмеге Алматы қаласы музейлер бірлестігі қорынан 220-дан астам экспонат қойылады. Көрме қазақ халқының тұрмысын, салт-дәстүрін, қолданбалы өнерін баяндайтын этнографиялық жәдігерлер, музыкалық аспаптар мен Алматы қаласының тарихы мен қазіргі өмірін көрсететін фотосуреттерге негізделген.
Алматы қаласы музейлер бірлестігі Қазақстанның қоғамдық және мәдени өміріне белсенді қатысады. Оның үлесінде 2022-2024 жылдары ерекше дамыған халықаралық ынтымақтастықтың кең бағдарламасы бар. Мәселен, бұған дейін Сеул (Корея Республикасы), Стамбул (Түркия), Неаполь (Италия) және Вена (Австрия) қалаларында үлкен жетістікпен өткізілген халықаралық көрмелерді атауға болады.