Павлодарда үш жасар қыз қайшымен ойнап жүріп абайсызда көзін жарақаттап алған, – деп хабарлайды aqshamnews.kz тілшісі Pavon.kz сайтына сілтеме жасап.
Дәрігерлердің айтуынша, жарақат өте ауыр болған. Қайшы көздің мөлдір қабатын зақымдап, ішкі құрылымдарына дейін жарақат салғандықтан, уақыт жоғалтуға келмеген. Балаға шұғыл түрде күрделі операция жасалып, көз жанары сақталып қалды.
Дереккөз мәліметінше, ата-анасы алғашқыда жарақаттың ауыр екенін бірден аңғармаған. Кейін баланың көзі жасаурап, ісіне бастаған соң, оны жедел түрде ауруханаға жеткізген.
Мамандар тәуекелге барып, күрделі ота жасап, қысқа уақыт ішінде әрекет еткен офтальмологтер тобы баланың көзін аман алып қалған. Қазір қыз бала үйіне шығарылған.
Дәрігерлер ата-аналарға үй жағдайында балалардың қолына қайшы секілді қауіпті заттарды бермеуді және қауіпсіздік шараларын күшейтуді ескертті.