Павлодар облысында «Борышкер» жедел алдын алу іс-шарасы барысында 34 миллион теңгеден астам өтелмеген берешегі бар ұйымға тиесілі көлік анықталып, арнайы тұраққа қойылды, – деп хабарлайды aqshamnews.kz тілшісі.
Павлодар облысында берешегі бар азаматтарды анықтауға бағытталған рейдтік шаралар жалғасып жатыр. Патрульдік полиция, прокуратура және сот орындаушылары бірлесіп «Борышкер» профилактикалық іс-шарасын өткізуде. Оның мақсаты – әкімшілік қаулылардың орындалуын қамтамасыз етіп, қарыздарды өндіріп алу.
Кезекті тексеру кезінде жол қозғалысы ағынынан Cadillac Escalade көлігі тоқтатылды. Тексеру барысында аталған автокөлік иесі саналатын ұйымның 34 миллион теңгеден астам өтелмеген берешегі бары анықталған.
Павлодар қалалық полиция басқармасы патрульдік полиция батальоны қызметінің инспекторы Жандос Мейрамғазының айтуынша, жеке сот орындаушысының қаулысы негізінде көлік арнайы айыптұраққа қойылған.
Тәртіп сақшылары тұрғындарға әкімшілік айыппұлдар мен өзге де қарыздарды уақытылы өтеу қажет екенін ескертті. Бұл мәжбүрлі шаралардың, соның ішінде мүлікті тәркілеу мен көлікті айыптұраққа қоюдың алдын алуға мүмкіндік береді.