Павлодар облысының Ертіс ауылында жеке тұрғын үйден өрт шығып, кәмелетке толмаған екі бала қаза болды, деп хабарлайды Aqshamnews.kz тілшісі.
Оқиға жөніндегі хабарлама «101» қызметіне бүгін таңғы сағат 08:33-те түскен. Өрт сөндіру бөлімшелері оқиға орнына үш минут ішінде жеткен. Алайда олар келген сәтте үй толықтай отқа оранып, шатыр, жиһаз және тұрмыстық заттар жанып, қою түтін шыққан.
Төтенше жағдайлар департаментінің мәліметінше, өрт сөндірушілер жедел әрекет етіп, үй ішінен кәмелетке толмаған үш баланы алып шығып, жедел жәрдем қызметіне тапсырған. Тағы бір бала құтқарушылар жеткенге дейін сыртқа шығарылған. Дегенмен ауыр халде ауруханаға жеткізілген екі бала дәрігерлердің барлық күш салуына қарамастан көз жұмды.
Өрт шамамен 50 шаршы метр аумақты қамтыған. Қазіргі таңда оқиғаның шығу себептері анықталып жатыр.