Парламенттік реформаға қатысты 350-ден аса ұсыныс түскен. Бұл туралы Мемлекеттік кеңесші Ерлан Қарин мәлімдеді, - деп хабарлайды aqshamnews.kz тілшісі.
Парламенттік реформа жөніндегі жұмыс тобының қазан айында өткен алғашқы отырысында Мемлекет басшысы келіп түскен ұсыныстарды жан-жақты пысықтап, парламенттік жүйені жаңғырту жөнінде нақты ұсынымдар әзірлеу қажет екенін атап өткен еді.
Отырыстан кейін алдағы парламенттік реформаға қатысты ұсыныстар жинау үдерісі басталды. Жұмыс тобының мүшелері, сондай-ақ Amanat, Ауыл, Respublica, Ақ жол, ҚХП, ЖСДП саяси партиялары өздерінің көзқарастары мен ұсынымдарын жолдады. Сонымен қатар E-otinish және E-gov платформалары арқылы азаматтардан, сарапшылардан, қоғам белсенділерінен 350-ден астам ұсыныс түскен.
Кеше Парламенттік реформа жөніндегі жұмыс тобының кезекті отырысы өтіп, болашақ бір палаталы Парламент моделін қалыптастыруға қатысты мәселелердің бірінші блогы қаралды. Атап айтқанда:
-
бір палаталы Парламент құрамындағы депутаттар саны;
-
Парламент депутаттарына қойылатын біліктілік талаптары;
-
депутаттарды сайлау тәртібі;
-
жаңа Парламенттің өкілеттілік мерзімі;
-
Парламенттегі квоталар (президенттік, партиялық тізім).
Екі сағаттан астам уақытқа созылған конструктивті талқылау барысында түрлі сарапшылық ұстанымдар мен пайымды пікірлер ортаға салынды. Отырыста айтылған ұсыныстарды қосымша егжей-тегжейлі саралап, жүйелеу туралы шешім қабылданды.
Мемлекеттік кеңесші Ерлан Қариннің айтуынша, жұмыс тобының алдағы отырыстарында парламенттік жүйені жаңғыртудың басқа да бағыттары қарастырылатын болады. Реформа шеңберіндегі ұсыныстар жинақталып, бір палаталы Парламент моделін қалыптастыру бойынша кешенді қорытынды ұсынымдар әзірлеу жоспарланып отыр.
