Төрткүл дүниені тік тұрғызып, теледидарға телмірткен 4 жылдықтың басты бәсекесі де өз мәресіне жетті.
Тағы бір еске сала кетейік, Парижде өткен XXXIII Олимпиадада еліміздің спортшылары 1 алтын, 3 күміс, 3 қола жүлде олжалап, командалық есепте 43-ші орынды иеленді. Енді алда Паралимпиада ойындары жалауын желбіретеді. Ерекше жандар арасындағы дода 28 тамыз бен 8 қыркүйек аралығында өтеді деп жоспарланған. Қазақстан қоржынында спорттың 9 түрінен 33 лицензия бар.
Атап айтар болсақ, пара дзюдодан 10, пауэрлифтингтен 5, пара жеңіл атлетика, жүзу және таэквондодан төртеуден бар. Ал пара каноэ мен оқ атудан 2 лицензиядан, ал отырып ойнайтын волейбол мен үстел теннисінен бір-бір жолдамадан бар. Айта кету керек, Токио-2020 Паралимпиадасына Қазақстан ұлттық құрамасының 25 спортшысы қатысып, 5 медаль, яғни 1 алтын, 3 күміс және 1 қола медаль жеңіп алды. Нәтижесінде еліміз жалпыкомандалық есепте 48-ші орыннан көрінді.