Таңмен таласа тұрған Бердібековтер отбасы Бостандық ауданының тұрғындары. Бүгін олар көппен бірге өздерінің тұрғылықты жері бойынша №240 сайлау учаскесіне барып дауыс берді.
– Бүгінгі күн құдды бір жаңа өмірге, жаңа кезеңге қадам бастыратындай. Күнде жаңбыр жауып тұрған ауа райының бүгін шайдай ашылып, сайлаушыларға жағдай жасап тұрғанын жақсылыққа баладық. Біз бүгін отбасымызбен келіп, өз таңдауымызды жасадық. Өйткені, ел өміріндегі маңызды оқиғада шешім қабылдап, үлес қосуды міндетіміз деп білеміз. Ұлым мен қызым да кәмелетке толған жастар болған соң, өздерінің азаматтық ұстанымын білдіруге бізбен бірге келді. Олардың Отанына, еліне, туған жеріне деген сүйіспеншілігіне қарап, өзім де іштей риза болдым, - дейді жанұяның отағасы Әбдіжаппар Бердібеков.