Әскери қақтығыстарға байланысты Таяу-Шығыс елдерінде қалып қойған Қазақстан азаматтарын қауіпсіз эвакуациялау сәтті жүзеге асып жатыр. Алғашқы рейспен 314 отандасымыз Алматыға жетті. Қазақстан аймақ елдерінің арасында алғашқы болып өз азаматтарын елге қауіпсіз жеткізді. Аqshamnews.kz тілшісі әуежайдан фоторепортаж ұсынады.
4 наурызда SCAT әуе компаниясының Алматы – Маскат – Алматы бағыты бойынша рейсі сағат 15:09-да Алматы әуежайына сәтті қонды. Дубайдан эвакуацияланған жолаушыларды тағатсыздана күтіп тұрған туған-туыстары мен жақындары көз жасына ерік берді.
Біріккен Араб Әмірліктерінен елге қайтарылған отандастарымыз Қазақстан Президенті мен Үкіметіне алғыстарын білдірді. Олардың айтуынша, геосаяси турбуленттілік кезеңінде мемлекет тарапынан жедел шешім қабылданып, қауіпті аймақтағы азаматтар қараусыз қалмаған.
«Отанымыздың қамқорлығы бізге үлкен демеу болды», – дейді Шымкент қаласының тұрғыны Карима Мурафиева. Ол әуежайда тұрып:
Сиреналардың дауысы, жарылыстар, үйге жете аламыз ба деген алаң – барлығы қатты әсер етті. Қазақстан Республикасы Сыртқы істер министрлігінің қызметкерлері бізбен байланысқа шыққан сәттен бастап сенім пайда болды. Көптеген өзге ел азаматтары әлі де сол жақта қалып қойғанын көрдік. Қазақстанның өз азаматтарына деген қамқорлығын сезіну – үлкен демеу болды. Дипломаттарымыздың жанашырлығының арқасында Оманға жөнелтілу туралы нұсқауды сабырмен күттік. Осындай сәтте бейбіт өмірдің, туған жердің қадірін түсінеді екенсің. Біз бастан өткерген жағдайды ешбір отандасыма тілемеймін, – деген ақжарма пікірін бөлісті.
Семей қаласының тұрғыны Жанат Төребеков те жұбайы және үш кішкентай баласымен елге оралды.
Біз Дубай қаласына отбасымызбен қыдырып бардық. Бала-шағамызбен. Сол жақтан мемлекеттің осындай көмегінің арқасында келіп отырмыз. Қазақстанымызға алғысымыз шексіз. Осындай жағдайда көмектесіп, тез ұйымдастырылды. Дубайдағы елшілікке рахмет айтамыз. Әрқашан хабарда болып, қолдап отырды, – деді Жанат Төребеков.
Қазір Қазақстан азаматтарын шетелден қайтару жұмыстары мүдделі мемлекеттік органдар мен әуе тасымалдаушылардың үйлестіруімен жалғасып жатыр. Құзырлы құрылымдар қауіпсіздікті басты назарда ұстап, әрбір азаматтың елге аман жетуін қамтамасыз етіп жатыр.
