Өскемен қаласының прокуроры Вилори Пан мас күйінде жол апатына түскеннен кейін қызметінен босатылып, әкімшілік қамауға алынды, деп хабарлайды Aqshamnews.kz тілшісі.
Шығыс Қазақстан облысының прокуратурасы мәлімдегендей, В.Пан құқық қорғау органдарының беделін түсіретін әрекет жасағаны үшін «Құқық қорғау қызметі туралы» заңға сәйкес прокуратура жүйесінен шығарылып, «1-дәрежедегі заңгер» шенінен айырылды.
3 қазан күні арнайы әкімшілік соттың шешімімен Пан мас күйінде көлік басқарғаны үшін кінәлі деп танылып, 20 тәулікке әкімшілік қамауға және жеті жылға көлік жүргізу құқығынан айырылды.
Бұған дейін таратылған ақпаратқа сәйкес, ол жол апаты кезінде көлігімен шам бағанасына соғылған.
