Өскеменде жеке үйде қазан жарылып, 7 жастағы қыз ауруханаға жеткізілді, деп хабарлайды Аqshamnews.kz тілшісі Yk.news-kz-ке сілтеме жасап.
ШҚО ТЖД мәліметінше, 28-шағын аудандағы жеке үйде ұзақ жанатын қазан жарылған. Құралдың жарылуы салдарынан үйдің ішкі бөлмеаралық қабырғасы зақымданған. Оқиға кезінде үйде 2017 жылы туған бүлдіршін болған.
Қыз бала Ана мен бала орталығына жеткізіліп, дәрігерлер тексеру жүргізген. Облыстық денсаулық сақтау басқармасының хабарлауынша, қараудан кейін баланы үйіне жіберген – денсаулығына тікелей қауіпті жағдай анықталмаған.
Оқиға орнына Өскемен әкімі Алмат Ақышев та барды. Оның айтуынша, төтенше жағдайға электр желілеріндегі ақаудан туындаған қазанның қызып кетуі себеп болған.
«Осы шағын аудандағы электр желілеріндегі проблемаларды он күн ішінде толық шешуді тапсырдым. Қазіргі уақытта оқиға кезінде үйде болған тұрғындар медициналық тексеруден өтіп жатыр. Алдын ала мәлімет бойынша, өміріне қауіп жоқ. Жағдай менің бақылауымда», – деді қала әкімі.
