Өскемен қаласында 57 жастағы ер адамның өліміне қатысты күдікті қолға түсті, деп хабарлайды Aqshamnews.kz тілшісі.
Шығыс Қазақстан облыстық Полиция департаментінің мәліметінше, 4 қарашада қаладағы үйлердің бірінің ауласынан 57 жастағы ер адамның денесі табылғаны жөнінде полицияға хабар түскен.
"Ізін суытпай жүргізілген жедел іс-шаралар нәтижесінде күдікті анықталып, ұсталды. Қазір ол уақытша ұстау изоляторына қамалды. Аталған факті бойынша ҚР ҚК-нің 99-бабы (Адам өлтіру) бойынша қылмыстық іс қозғалды", – деп хабарлады департамент.
Алдын ала болжам бойынша, қылмыс тұрмыстық жанжал салдарынан болған. Қазір оқиғаның барлық мән-жайын анықтау үшін тергеу амалдары жүргізіліп жатыр.