Өскеменде 16 жастағы қыз ауыр пышақ жарақатымен ауруханаға түсті. Дәрігердің айтуынша, жасөспірімнің іші мен сол қолына пышақ сұғылған, ал күдікті ретінде оның 22 жастағы жігіті ұсталған, – деп хабарлайды aqshamnews.kz тілшісі.
Өскемен қаласында 16 жастағы қыз ауыр жарақатпен ауруханаға жеткізілді. Бұл туралы хирург Қуаныш Жүнісов әлеуметтік желідегі парақшасында жазды.
Дәрігердің айтуынша, оған таңғы сағат 06:00 шамасында кезекші бөлімнен шұғыл хабарлама түскен. Онда кәмелетке толмаған қыздың өте ауыр жағдайда жеткізіліп жатқаны айтылған.
Хирургтің мәліметінше, жасөспірімнің іші мен сол қолына пышақ жарақаты түскен. Сондай-ақ пышақ жарасы омыртқаға дейін жеткені белгілі болды.
Оқиғаға байланысты редакция Шығыс Қазақстан облыстық полиция департаментінен ресми түсініктеме сұраған. Ведомствоның баспасөз қызметі күдіктінің ұсталғанын және бұл жағдай 7 ақпанда болғанын мәлімдеді.
Кейін полиция 16 жастағы қызды пышақтады деген күдікпен оның 22 жастағы жігіті ұсталғанын растады. Қазір ол уақытша ұстау изоляторына қамалған.
Еске салайық, бұған дейін, 11 қаңтарда Шымкентте 21 жастағы Нұрай Серікбайды өзіне ғашық болған жігіт аңдып жүріп пышақтап кеткен еді. Салдарынан бойжеткен оқиға орнында көз жұмған.