Біздің банктер тағы бір клиент толқынын күтіп отыр. Google Play-ден ресейлік MIR pay картасының көзін құртып жатыр. Ал Samsung Pay 3-ші сәуірден бастап Mir картасын қолдамайды, деп хабарлайды аlmaty-akshamy.kz.
Картаны Қазақстаннан-ақ ашып алып, қолдана беруге болады ғой, дегіңіз келіп тұр ғой... Алайда, ресейлік Banksta телеграм арнасы UBS мен Credit Suisse санкциядан қауіптеніп, екі елдің азаматтығы бар (швейцариялық және ресейлік) адамдардың шоттарын жаба бастағанын жазады.
Әрине, қазақстандық банктерді швейцариялық банктермен салыстыруға келмес, әйткенмен, соғыс одан әрі созылуда, демек Орталық Азия елдерінің банктері де санция зардабын тартуы әбден мүмкін. Бұған әрине, санкция салынбаған компанияларға қызмет көрсететін Қазақстан мен Ресей арасында корпоративтік операцияларды жүзеге асыратын банктерді қосып отырған жоқпыз.
Қытай, БАӘ мен Түркия елінің банктері соңғы аптада санкцияны сақтау талаптарын күшейткен. Бұл оқиға мұнай жеткізу ісінде Ресейге ақша аударудың кешігуіне немесе бас тартуына алып келді, - деп хабарлады Reuters.
БАӘ-дегі First Abu Dhabi Bank және Dubai Islamic Bank ресейлік тауарлардың саудасына қатысты бірнеше есепшотты бұғаттады. БАӘ-дегі Mashreq банкі, түріктің Ziraat және Vakifbank-тері, сондай-ақ қытайлық ICBC мен Bank of China төлемдерді өңдеу өте қиынға түсіп жатқанын айтады.
Түрік банктері қосалқы санкциядан қауіптеніп, Ресейден келген төлемдерді қабылдамай жатыр,-деп жазады Dünya. Экспортерлар жыл басынан бері ақшаларын ала алмай жатқан көрінеді. Ал билік болса, бұған «форс-мажорлық жағдай» деп баға беруде.