Оралда алаяқтар әйелді жалған мобильді қосымша орнату арқылы алдап, 5 млн теңгесін иемденген, – деп хабарлайды aqshamnews.kz тілшісі Polisia.kz сайтына сілтеме жасап.
Ведомство мәліметінше, әйелге белгісіз адамдар қоңырау шалып, SMS-кодты айтуын сұраған. Одан кейін алаяқтар қайта хабарласып, өздерін банк қызметкері және Қазақстанның Қаржылық мониторинг агенттігінің мамандары ретінде таныстырған.
Олар «қаржыны қорғау» сылтауымен әйелдің атына несие рәсімделіп жатқанын айтып, операцияны тоқтату үшін шұғыл түрде арнайы қосымша орнату керек екенін жеткізген.
«WhatsApp арқылы әйелге бағдарлама орнатуға арналған файл жіберілген. Қосымша жалған болып шығып, алаяқтарға оның телефонына қашықтан қол жеткізуге мүмкіндік берген. Құрылғыны бақылауға алған соң қаскөйлер 5 млн теңгеге несие рәсімдеп, қаражатты өз мақсаттарына жұмсаған», – делінген хабарламада.
Полиция тұрғындарға сақ болуды ескертті:
белгісіз адамдар жіберген сілтемелер арқылы қосымша орнатпаңыз;
банктің ресми қосымшаларын тек App Store немесе Google Play арқылы жүктеңіз;
мемлекеттік органдар мессенджер арқылы орнатуға арналған файл жібермейді;
осындай қоңыраулар түскен жағдайда сөйлесуді бірден тоқтатыңыз.
Аталған дерек бойынша тексеру жүргізіліп жатыр.