Алматыда бес мектеп Халықаралық бакалавриат (IB) бағдарламасын енгізу бойынша пилоттық алаң ретінде белгіленді. Бұл туралы қалалық білім басқармасы мәлімдеді, – деп хабарлайды aqshamnews.kz тілшісі.
Жоба аясында №201 мектеп негізгі мектепке арналған Middle Years Programme (MYP) бағдарламасы бойынша Халықаралық бакалавриат сарапшыларының верификациялық сапарынан өтті. Сапар 7–8 сәуір аралығында онлайн форматта өтіп, халықаралық білім беру стандарттарын енгізудегі жүйелі жұмыстың нәтижесі болды. Келесі аптада №159 гимназияда да осы бағдарлама аясында ұқсас верификациялық сапар өтеді.
Бағалау барысында мектеп әкімшілігімен, педагогтармен, оқушылармен және ата-аналармен сұхбат жүргізілді. Сарапшылар MYP бағдарламасының оқу процесіне енгізілуін, пәнаралық тәсілдің қолданылуын, сондай-ақ оқушылардың сыни ойлауы мен зерттеу дағдыларының дамуын жоғары бағалады.
Білім басқармасы пилоттық жобаға сонымен қатар №4 мектеп-интернат, №27 және №105 мектептердің де кіргенін атап өтті.
«Бүгінгі таңда біздің бес мектебіміз Халықаралық бакалавриатты енгізу бойынша пилоттық алаң болып белгіленді. Біздің міндетіміз — халықаралық білім беру стандарттары қаланың мемлекеттік мектептерінде қолжетімді болатын жүйе қалыптастыру», — деді басқарма өкілдері.
Келесі кезең — Халықаралық бакалавриаттың авторизацияланған мектебі мәртебесін алу.
Халықаралық бакалавриат (IB) — бұл сыни ойлауды, зерттеу дағдыларын және жаһандық дүниетанымды дамытуға бағытталған білім беру бағдарламасы. Бұл бағдарлама әлемнің 150-ден астам елінде іске асырылуда.