Орталық қалалық клиникалық ауруханаға сирек кездесетін клиникалық жағдай - ішкі ұйқы артериясын қысқан бізтәрізді өсіндінің ұзаруы орын алған науқас түсті.
Науқас 2 жыл бойы тамағындағы бөтен дене сезімі, жұтынудағы қиындық, салмақ жоғалту, бас айналу және есін жоғалту орын алғанын айтты, деп хабарлайды aqshamnews.kz
Профессор Серік Тұрсынбаев пен тамырлы хирургия бөлімшесінің меңгерушісі Рахман Сапарбаевтың жетекшілігімен дәрігерлер тобы өсіндіні алып тастау үшін күрделі ота жасады.
Хирургиялық араласу күрделі болды, өйткені ұзарған өсінді өмірлік маңызды тамырларға, соның ішінде миды қанмен қамтамасыз ететін ішкі ұйқы артериясына жақын болды. Кез келген қателік өмірге қауіп төндіретін салдарға әкелуі мүмкін еді.
Оның үстіне ұйқы артериясын қайта қарау және өсіндіні алып тастау бір уақытта жүргізілуі керек еді, бұл ерекше дәлдік пен жоғары шеберлікті қажет етті. Хирургтардың кәсібилігі мен үйлесімді жұмысының арқасында ота сәтті өтті.
Егер араласу уақытында жасалмаса, науқас инсультке шалдығуы мүмкін еді. Хирург, анестезиолог және медбикелер тобының үйлесімді жұмысының арқасында барлық тәуекел азайтылып, науқас асқынудан аман қалды.
Емделуші дәрігерлерге ризашылығын білдірді: "Диагностиканы уақтылы жүргізген және жедел араласу үшін ауруханаға жатқызуды ұсынған профессор Тұрсынбаев Серік Ерішұлына ерекше ризашылығымды білдіремін, ол мені өлімге әкелуі мүмкін ауыр зардаптан құтқарды. Сондай-ақ, бөлім меңгерушісі Рахман Сапарбаевқа және оның бүкіл командасына алғысымды білдіремін. Олар өз ісінің нағыз мамандары".
Бұл жағдай диагноздың сирек кездесетінімен де, хирургиялық араласудың күрделігімен де ерекше болды.
Профессор Серік Тұрсынбаев атап өткендей, мұндай жағдай өте сирек кездеседі:
"Ересектерде бізтәрізді өсінді ұзындығы орта есеппен 20-30 мм, ал Азия тұрғындарында - 15,4-18,8 мм болады. Ұзындығы 30 мм-ден асатын өсінді ұзарған болып саналады. Мұндай өсінді негізінен 30 жастан асқан адамдардың шамамен 4%-да кездеседі және 4% жағдайда олардың болуы клиникалық белгілермен бірге жүреді. Біздің жағдайда өсіндінің ұзындығы 1,5 см болды", - дейді ол.
Міндетті әлеуметтік медициналық сақтандыру аясында бірегей және күрделі ота жасалды және қазіргі уақытта науқас ауруханадан шығуға және толыққанды өмірге оралуға дайындалып жатыр.