Қазақстанның танымал эстрада әншісі, тележүргізуші Тамара Асар Алматыда өткен «Хан Сұлтан. Алтын Орда» операсының премьерасынан ерекше әсер алғанын жеткізді.
– Ең алдымен, қойылымға қатысқан барлық шығармашылық топқа үлкен құрмет. Меніңше, Хан Сұлтан бейнесі – жауынгер әрі ана ретінде өте жақсы ашылған. Қойылымның басынан соңына дейін көз жасымды тия алмадым, өйткені әрбіріміздің бойымызда аналық мейірім, жауынгерлік рух және әйелге тән нәзіктік бар. Біз осы қасиеттердің барлығын бір әйелдің бойынан көрдік. Сонымен қатар, Хан Сұлтан елге, жұбайына, балаларына адалдықтың керемет үлгісін көрсетті, – деп бөлісті Тамара Асар.
Әншінің айтуынша, бұл опера Қазақстан үшін үлкен маңызға ие.
– Сондықтан оны әрбір азамат көруі керек деп ойлаймын. Қойылымды сахналаушыларға, идея авторларына, жазушыларға, әртістерге, опера әншілері мен музыканттарға шексіз алғыс. Бұл жерде тек тарих қана емес, адалдық, психология және адамгершілік туралы терең мағына бар. Сонымен қатар, шынайы арнайы эффектілер ерекше әсер қалдырды, бәрі соншалықты нанымды әрі тірі көрінді, көрермендер сол дәуірдің оқиғаларына толықтай енді, – деді әнші.
