Таиланд пен Индонезияда табиғи апат салдарынан қаза тапқандар саны 500-ге жетті. Мемлекет басшысы Қасым-Жомарт Тоқаев екі ел халқына көңіл айтты, - деп хабарлайды aqshamnews.kz тілшісі.
24.kz мәліметінше, Таиландтың оңтүстігі де су тасқынынан қатты зардап шекті. Бұл елде табиғат апатынан 162 адам көз жұмды. Ең көп шығын Сангкхла провинциясында тіркелді. Онда 126 адам опат болды. Жалпы тасқыннан 3 миллионнан астам тұрғын жапа шекті. Тоғыз провинцияны су басып, мыңдаған адам қауіпсіз жерге көшірілген. Кей аудандарға азық-түлік пен дәрі-дәрмек тікұшақпен жеткізіліп жатыр.
"Индонезияда су тасқыны мен көшкін салдарынан опат болғандар саны 303-ке жетті. Тағы 200-ге жуық адам із-түссіз жоғалған. Қираған жолдар іздестіру-құтқару жұмыстарын қиындатып отыр. Биік жотадан аққан лай мен тастардың астында қалып қойған адам көп. Апат аймақтарына көмек тікұшақ арқылы жеткізіліп жатыр", - делінген хабарламада.
Мемлекет басшысы Индонезия Президенті мен Таиландтың Премьер-министріне көңіл айту жеделхаттарын жолдады.
Қасым-Жомарт Тоқаев аталған елдердің аумағында болған су тасқыны салдарынан көптеген адамның қайтыс болуына байланысты Индонезия президенті Прабово Субиантоға және Таиланд премьер-министрі Анутин Чарнвиракулға көңіл айтты.
