Астанада Қазақстанда атом электр станциясын (АЭС) салуды қолдау мақсатында Халықтық штаб құрылды. Штаб құрамына 6 саяси партия мен 20-ға жуық республикалық қоғамдық бірлестіктің 250-ден астам өкілі кіреді. Аймақтарда да осындай құрылымдар жасақталып жатыр. Осы бастаманы қолдауда Қазақстан Халық партиясы (ҚХП) белсенділік танытып отыр.
Халықтық референдумда әрбір қазақстандықтың дауысы маңызды. Штабтың негізгі мақсаты — халық арасында ауқымды түсіндіру жұмыстарын жүргізіп, отандық атом энергетикасын қолдауға қоғамды жұмылдыру. Бұл іске Парламент пен мәслихат депутаттары, зиялы қауым өкілдері, ғалымдар, мәдениет және спорт қайраткерлері, қоғам белсенділері де атсалысуда. Павлодар облысында да аймақтық штаб құрылды, оған ҚХП облыстық филиалының төрағасы, мәслихат депутаты Илья Мухортов енді. Штаб мүшелері мемлекеттің тұрақты дамуы референдумда қабылданатын шешімге байланысты деп санайды.
Штаб мүшелері референдумды қолдауға бағытталған түсіндіру жұмыстарын қарапайым тілде жүргізуді басты міндет етіп қойып отыр. Түркістан облысында штабқа ҚХП жергілікті филиалы басшылары Зухра Қамбарова мен Ысқақ Ахметов кірді. Солтүстік Қазақстан облысында ҚХП филиалының өкілдері Ерғали Жұмағұлов пен Болат Қожахметов және кеңес мүшелері штабтың құрамын толықтырды.
Батыс Қазақстан облысында ҚХП филиалының басшысы Борис Лаврентьев, Қарағанды облысында ҚХП филиалының басшысы Қалел Мақсұтов пен мәслихат депутаты Анатолий Баранов штаб құрамына қосылды. Сонымен қатар, Ұлытау өңірінде ҚХП филиалы төрағасының орынбасары Бақытбек Төрежанов, Балқаш қалалық өкілдігінің төрағасы Қаныш Ысқақов та штабтың мүшесі болды.
ҚХП Ақмола облыстық филиалының басшысы Арман Тастамбеков, Атырау облысында филиал төрағасының орынбасары Әлия Мұрзағалиева, ал Ақтау қаласында Бауыржан Құрманғазин мен Марат Нұркеев штабқа қосылып, Маңғыстау аймағында бұл міндет Рәнида Балжановаға жүктелді.
Штабтың негізгі міндеті — ақпараттық-насихат жұмыстарын жүргізу. АЭС құрылысына қатысты өтетін референдумға бір ай ғана уақыт қалды, сондықтан штаб мүшелері белсенді жұмыс істеуде.